ಮೌನ - ಸ್ಪಂದನ

ಹೃದಯದಿ ತುಂಬಿರಲು
ನೂರೆಂಟು ಭಾವ
ವಿವರಿಸಬಲ್ಲುದೆ ಶಬ್ದ-ಕೋಶ
ಮನದಿ ತುಂಬಿದ ತುಮುಲಗಳ...
ಆತ್ಮೀಯರ ಮನ ಮುಟ್ಟುವಂತೆ?

ಮಾತೆಯ ಮಮತೆಯ ಸ್ಪರ್ಶ..
ಮುಗ್ಧ ಮಗುವಿಗೆ ನೀಡುವ ಸಿಹಿ ಮುತ್ತು
ಮಾತನಾಡುವುದೇ ಪದಗಳಲಿ?
ಪದಗಳಿಗೆ ಇಲ್ಲಿ ಬೆಲೆಯೆಲ್ಲಿ?
ತುಂಬಿ ಬಂದಿರಲು ಪ್ರೀತಿ ಮನದಲಿ..

ಆ ಒಂದು ಕಣ್ಣಿನ ನೋಟ..
ನುಡಿವುದು ನೂರು ಮಾತುಗಳ
ಸ್ಪಂದಿಸಬೇಕಾದಲ್ಲಿ ಹೃದಯ
ಬೇಕಿಲ್ಲ ಮಾತುಗಳ ಆಶ್ರಯ..

ಹೃದಯದಾಳದಲಿ ಹೆಪ್ಪುಗಟ್ಟಿದ
ನೋವು-ದುಃಖಗಳ
ಹೇಳಲು ಸಾಧ್ಯವೇ ಬರಿ ಮಾತಿನಲಿ?
ಎಲ್ಲ ಮಾತುಗಳು ಕರಗಿ ನೀರಾಗುವವು
ಮೌನ ರಾರಾಜಿಸುವುದಿಲ್ಲಿ...

ದೈನಂದಿನ ಬದುಕಿಗೆ ಮಾತು ಅಗತ್ಯ
ಮಾತಿಲ್ಲದೆ ದೈನಂದಿನ ಬದುಕು ನಕಾರ..
ಆದರೆ
ಹೃದಯವಂತರ ಲೋಕದಲಿ
ಭಾವನೆಗಳ ಸಂಗಮದಲಿ..
ಮಾತು ಬೆಳ್ಳಿ ಅರ್ಥಪೂರ್ಣ ಮೌನ ‘ಬಂಗಾರ’!

 ಚಿತ್ರ ಕೃಪೆ: ಅಂತರ್ಜಾಲ