ಪ್ರಶ್ನೆ?

ನಿನ್ನ ಪ್ರೀತಿಗೇಕೆ ಅರ್ಥವಿಲ್ಲ?
ದಿಕ್ಕು-ದೆಸೆಗಳಿಲ್ಲ?
ಸರಾಗವಾಗಿ ಸಾಗಿ
ನನ್ನಂತರಾಳ ಕಲುಕಿ
ಪ್ರೀತಿ ಕುಲುಮೆ ಕುದಿಯುವಾಗ
ನೀನೇಕೆ ಮೆಲ್ಲ ಜಾರುವೆ?
ನಾನೇಕೆ ನೋವ ಮೇರೆ ಮೀರುವೆ?

ಕಣ್ಣಿನಲ್ಲಿ ನವಿಲ ಬಣ್ಣ ಕನಸು
ಮನಸಿನಲ್ಲಿ ಪ್ರೀತಿ ಹುಲುಸು ಹುಲುಸು
ನಾನು ಮನಸು, ನೀನು ಕನಸು
ಎಲ್ಲ ಈಗ ಇರುಸು-ಮುರುಸು
ಬೇಕೆ ಪ್ರೀತಿ ವೇದನೆ?
ಯಾತಕಾಗಿ ನನ್ನ ಪ್ರಾರ್ಥನೆ?

ಇತಿಗಳಿಲ್ಲ ಮಿತಿಗಳಿಲ್ಲ
ಎಲ್ಲೆಲ್ಲೂ ಪ್ರೀತಿ ಪಥಗಳೇ
ನಿದಿರೆಯಿಲ್ಲ, ಮಂಪರಿಲ್ಲ
ನಮ್ಮ ಪ್ರೀತಿ ಕಥೆಗಳೆಲ್ಲ ವ್ಯಥೆಗಳೇ?!

ನೋವ ನಲಿವ ಬೇಧ-ಭಾವ
ಇರದ ಮನದ ಮಂಥನ
ಪ್ರೀತಿ ಬರಲಿ ಬರದೆ ಇರಲಿ
ಪ್ರೀತಿ ಇರುವುದಂತೂ ದಿಟ
ನಲಿಯಬೇಕು ನೋವ ತಳ್ಳಿ
ಅದೇ ತಾನೇ ಬದುಕ ಹಟ?